تنہائ کے دنوں میں تنویر قاضی صاحب کا نسخہ خاص نظم کی کوکھ میں نظمیں پلتی ہیں *موت ڈاٹ کام مالیگاوں* کے لیے تنویر قاضی کی مٹی بھر منفرد نظمیں صرف *موت ڈاٹ کام مالیگاوں* بلاگ کے لیے احمد نعیم بھارت

ماسک لگانے والے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اگر

تمہارے کان ہیں

جو

ماسک لگانے کے لِئے

ضروری ہیں

تو

سُنتے کیوں نہیں

اگر

سُنتے ہو

بولتے کیوں نہیں

غور سے 

دیکھو

درِ زِندان 

کُھلا ہے

tanveerqaazzii🔴

تھیراپی

۔۔۔۔۔۔۔۔۔۔۔۔۔۔۔۔

سواں ندی سے بہتے

ٹاور تک

ٹاور سے پھر

ہاکس بے کی لہروں بیچ

اُتاریں سفر تکان

سُندریا

شب 

چاند سمیت

اُتری ہے سمندر پر

چرخہ کاتتی بُڑھیا دھیان لگی ہے

 تاگاتاگا سُلجھانے

تونبا تونبا 

 بہت کپاس ترکلے سے اُترے تو ختم ہو عُریانی

قیمتی پوشاکیں بُننے میں 

چادر چادر خرچ ہوئے جگراتے

چاند کی شہہ پر

آپے سے باہر ہے سمندر آج کی رات

چَھل چَھل چَھل 

اک خوبصورتی

ڈُوبنے پر اُکساتی ہے 

لہریا لہر لہر

کمر کا بَل 

شاٹیکا شاٹیکا

تھراپی

سمندری پانیوں سے کم درد کرے گی

آنکھیں نَم کرتی

کوئی پُرانی یاد

لہریں شور مچاتی رہیں گی مسلسل

بچھڑے ہوئے لوگوں کے پیچھے بھاگتی

کون کرائے چُپ ان کو

یادوں کا ماتم کرتے

پلک جھپکتے

ریت عقب سے

کور مگرمچھ آئیں گے

سیک دھرے گا

ٹکور کرے گا

نُصرت کا ساحل سے آتا 

 اُداسی بھرتا  لمبے ہجر کا گیت

وصل کی مچھلی کا خیمہ تانے گا منظر

ایک دوسرے میں چُھپ کر ہم

نمک ملاپ ، مساج و مرہم

پُشت کا درد مِٹائیں گے

tanveerqaazzii

طویل نظم ؛؛ سُندریا ساندلیا نیلیا اور موہنجو دارو؛؛ کا ایک ایپیسوڈ

🔴مکتبِ عشق کی میم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ

اپنی کلاس کا

وہ

طالبِ علم ہے

جس کا

 پڑھائی میں دل نہیں لگتا

ٹُکر ٹُکر 

میم کے رنگِ پیراھن میں گُم رہتا ہے

فوّارے کی اندرونی ڈھلوان کی پِھسلن پر

دائرے بناتا

باغ کی بارہ دری کی

 لُکّن میٹی

تتلیاں

پُھول

بانہوں میں بھر بھر 

کلاس روم لاتا

خالی ہاتھ گھر چلا جاتا ہے

محافظ سے آنکھ چُراتے

چُٹّھی کے دن بھی

اُسے مکتب کی دیوار پھلانگتے دیکھا گیا

نتیجہ صفر بٹا سو

اگر بیچ کچھ نہیں

پھر کسی نے ؟

پلُّو سمیٹتے

آگے ہو

چاکلیٹ 

بائیٹ کیوں لی

tanveerqaazzi

🔴سمر آف 42

۔۔۔۔۔۔۔۔۔۔۔۔۔۔۔۔۔۔۔۔۔۔۔

اشکوں کی

ڈھلوان کی پِھسلن پر

دونوں بے چھب جسموں نے

ایک نویکلا رقص کیا

دُھندلاھٹ میں

ناف سے ناف مِلاتے

اک نمکین وصال میں آتے

شربت شربت ہوتے

وعدہ نقش کیا

پنگھٹ پر ملنے کا

بے ڈھنگی

پینٹنگ پر بے ڈھب سپنوں جیسا

آڑھی تِرچھی کھینچ لکیریں

فطرت رنگا نقص کیا

ٹُوٹے آئینوں کو جوڑا

جُڑتے موتیوں کو توڑا

ایک دوسرے میں گم ہوتے

کرچی کرچی عکس کیا

لمبے ہجر سے پہلے

اپنی خاک اُڑائی

شجر اُگائے

اپنے اپنے 

یاد گلی کی گیلاھٹ میں

درد دھریکلا رقص کیا

tanveerqaazzii

🔴بے وفا لڑکی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایسا نہیں کرنا تھا

بند کِئے سارے دروازے

سواں ندی پر آ جاتی تھی

 مُکھ کی لَو سے

جلنے لگ جاتے تھے دیئے

دید چناب کنارا روشن ہو جاتا تھا

ریتلا راوی 

پانی سے بھر جاتا تھا

باغ بُجھا ہے

بارہ دری میں اتنا اندھیرا پہلے کبھی نہیں دیکھا

فوّارہ فوّارہ نیلاھٹ

ڈھلوانوں سے جائے پِھسلتی

رُخ اُس  نے کیا موڑا

جھرنا جھرنا بہتا رستہ

بٹ گیا ٹُوٹے آئینوں میں

سُندریا ساندلیا نیلیا 

کس میں رُوٹھی ناری دیکھوں

اک جیسی تینوں کی شکلیں

پُشت کِئے رُوٹھی جاتی ہیں

آخری بار دکھائی دی تھی

جنگل جاتے

کالے ہرنوں کا بہلاوہ

دن کے سپید کبوتروں سے کر دے گا دور اُسے

سچل سیّاں

کسی موہنجودارو کے کھنڈرات میں دیکھنا

یا پھر زیادہ مچھلیوں میں اک مچھلی

اُس کے بھید میں 

سواگت کو لِپٹے گی

ساحلی ریت

 اور ہرے سمندر بیچ 

کہیں وہ

 پیاسی مر جائے گی

tanveerqaazzii

🔴شاٹِیکا شاٹِیکا دُودھیا صُبح اور مساج

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔.............

شولڈر بیگ

اٹیچی

دوسرا سب سامان

دیا ہوتا مجھ کو

اتنا بوجھ نہیں اُٹھتا تجھ سے

اونچی نیچی راہوں میں

چُک پڑ سکتی ہے

ٹیس کمر کی

لہراتی ہے پاؤں کی ایڑھی تک

شاٹیکا شاٹیکا

چلو گی کب تک

سستا لو تھوڑا سا

آلِو آئل مساج

سانسوں کی گرمی ہے

پین کِلر

تیرا درد میرا چہرہ کرتا ہے زرد

ہجر و فراق کی اینٹھن

چین نہیں لینے دیتی

کُوزوں میں

پانی اور باجرا مانگیں

دل کی پیاس کا صحرا جھیلتے

بُھوک بدن کی سہتے

سپید کبُوتر

ہارڈ بیڈ

ادرک کا قہوہ

سواں ندی کا ازلی جَل اشنان

نرم و سخت ہتھیلی کا چلنا

روکے گا پوروں میں اک کور تشنُّج کو

باہر آؤ سوانی

نیلے پانیوں کی جانب

مچھلیوں کی رنگینی اور رفتار میں 

گُم کر دے گا

سیدھی اور مخالف سمت کا دھارا

پِیڑا کم کر دے گا

آبی پرندوں کا ٹھنڈے پانی میں نہانا

استعارہ دلجوئی کا

آبِ گرم کا شاور

اونگھتا نیند اشارہ

گھیرتی کالے ہرنوں کی شب

اوٹ میں جب تُو مُسکائے گی

دُودھیا صُبح چڑھ آئے گی

سیڑھی سیڑھی

tanveerqaazzii

شیش محل کی فربہ بِلّیاں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

غُربت کے پاتال سے اُٹھ کر

آیا ہوا ایک نامانوس بندہ

پیٹ پر پتھر باندھے

ریستوراں میں داخل ہوتا ہے

بیٹھتے 

اپنی ہی اوٹ میں چُھپتا

کھانے کا کہتا ہے

ایک پلیٹ شوربہ

ایک روٹی

یہ چیزیں اشرف ویٹر نے

پانی کے گلاس کے ساتھ رکھ دیں

کھانے میں بچی

 گوشت کے ذرات سے لتھڑی ہڈیاں

اُن کی طرف نہیں پھینکی گئیں

وہ موٹاپے کی چربی پگھلنے کے ڈر سے

 ناراض ہیں

شیش محل کی بِلّیاں

اپنی فربہی کی مدافعت میں

خستہ حال گاہک پر غُرّاتی ہیں

پھر کبھی 

اُس شخص کو

طعام گاہ کی سیڑھیاں

چڑھتے نہیں دیکھا گیا

tanveerqaazzii

,,شیش محل,, گوجرانوالہ کا ایک ریستوراں