ٹال مٹول ایرا غیرا نتھو خیرا __1
🔴 مدثر عباس کی دو نظمیں
آدمی کو جھاڑ دیا جاتا ہے اور جسم
سے جدا ہونے والی زندگی کے ذرات شیشیوں
میں بند کر کے خوابوں کی تجربہ گاہ
میں بھیج دیے جاتے ہیں
آوازوں کے سینیٹری ورکرز کا بگولا
چل رہا ہے اور لوگ اپنے دھڑ پر آویزاں
خربوزے رانوں کے درمیان چھپا رہے ہیں
شیر خوار بچے ایڑیاں رگڑ رہے ہیں
اور ماؤں کے پستانوں سے دودھ
کا ایک ریلا انسانی حقوق کی مختلف
شقوں میں ترجمہ ہو رہا ہے
دریا شہر کے وسط میں ٹہل رہا ہے
کسی نوجوان لڑکی سے اس کے جسم
کی قیمت دریافت کئے بغیر
دفتر میں رکھی پرانی فائلوں کی
بو سے خالی آسامیوں کا دم گھٹ رہا ہے
اور ریٹائر ہونے والے ملازمین
آئینے میں اپنی پنشن کو اپنے چہرے
کے ساتھ جوڑ کر دیکھ رہے ہیں
پرندوں کی آنکھ سے شہر کو دیکھنے
والے چیونٹی کی آنکھ میں کھٹکتے ہیں
زرافے کی گردن سے سٹاک ایکسچینج
کی اونچائی بڑھتی جا رہی ہے
اور بندر ڈارون کو ماں بہن کی
گالیاں دے کر بھاگ جاتا ہے
خنزیر ایک تقریری مقابلے میں
جوش خطابت میں کہہ رہا ہے
"برگر کی طرح بنی بلند عمارتیں اور
ان کے درمیان بے گھر لوگ جنہیں
زیادہ سے زیادہ کیچپ کے طور پر استعمال
کیا جا سکتا ہے
باسٹرڈز !
ایک ریوڑ کی طرح چلو اور اپنا کاسہ بادلوں
کے منہ پر اتنے زور سے مارو کہ بادلوں کی باچھوں
میں سجا برگر پورے شہر پر برس پڑے
اور لوگوں کی چھتریاں گم ہو جائیں"
ریچھ اور کتے کسی تقریری مقابلے میں حصہ نہیں لیتے
وہ شطرنج کھیلنے میں اتنے مصروف ہیں کہ وہ یہ تک
نہیں جان پاتے کہ کب وہ شطرنج کھیلتے کھیلتے
مر گئے اور ملکہ پیادوں کے ساتھ بھاگ گئی
____-------__________
2
کیا عبادت گاہوں میں یرغمال شدہ خدا کو بازیاب
کرا کر جنگ عظیم دوم کے مظلوم یہودیوں
کے سامنے احتساب کے لئے پیش کیا جائے گا؟
یہودیوں کے سامنے احتساب کے لئے پیش کئے
جانے والا خدا کیا اتنی مقدار میں بچ جائے گا
کہ کم از کم ایک فلسطینی کے سامنے احتساب
کے لئے پیش کیا جا سکے ؟
کیا موسی اور محمد کے درمیان مفاہمت کے
لئے امریکہ یا نیٹو کو بلوایا جا سکتا ہے؟
کیا عیسی ,محمد اور موسی کو اپنے گھر دعوت
کے لئے مدعو کر سکتے ہیں ؟
اور ایسا نہ کرنے کی صورت میں اسامہ بن لادن
سے ثالثی کے کردار کی سفارش کی جا سکتی ہے؟
بدھا, اشوک اینڈ کمپنی کے کندھوں کو ہلا کر
کشمیری لاشوں کو انگلی پکڑا کر ان کے سامنے لانا
کس قدر مناسب اور بر وقت ہو گا ؟
مارکس کو کسی اچھے کارتوس کے ساتھ باندھ
کر امریکہ کی بلند و بالا عمارتوں کی دیواروں
میں فائر کر کے ایک معمولی سوراخ نہیں بنایا جا سکتا
تا کہ انسانی جسم سے نکلنے والے کنکریٹ رنگ
کے خون کو ادھڑے ہوئے پلستر والی دیواروں
پر لیپا جا سکے؟
اور
یہ نظم پڑھنے سے پہلے خداوں سے پڑھنے لکھنے کی طاقت سلب نہیں کی جا سکتی ؟
لڑکو!
بلی کو کون قائل کرے گا کہ گھنٹی
اس کے جسم کا حصہ تھی جسے کوتاہی برتتے ہوئے
ڈارون نے اس کے جسم سے جدا کر دیا تھا
اور اپنے گلے میں ڈال کر رقص کرنے لگ گیا
بلی پوچھ سکتی ہے کہ چرچ میں بجنے والی گھنٹی
وہی تو نہیں ؟
تو تم جواب میں کہہ دینا کہ "نہیں"
0 Comments